“အမလေး ညောင်းလိုက်တာ……ဂျွတ်”
"တနေကုန် စာဖတ်ရတာ ပင်ပန်းလိုက်တာ….ဂျွတ်”
ကိုယ့်ပတ်ဝန်းကျင်မှာပဲ ဖြစ်ဖြစ်၊ကိုယ်ကိုယ်တိုင်ပဲ ဖြစ်ဖြစ် ညောင်းလာပြီ၊ပင်ပန်းလာပြီ ခံစားရတဲ့အခါ တင်းနေတဲ့ ဇက်ကြောတွေ လျော့သွားအောင် ဆတ်ခနဲ ချိုးလိုက်ကြတဲ့သူတွေ ရှိလား။
ထိုင်ရတာ ကြာလာတဲ့ လူတွေမှာဆိုရင် ခေါင်းကို အနေအထားတခုထဲမှာပဲ အကြာကြီး ထားထားရတဲ့အတွက်ဇက်ကြောတင်းတာ၊လည်ပင်း ညောင်းတာနဲ့ ကြွက်သားတောင့်တင်းတာမျိုးဖြစ်တတ်ပါတယ်။ဒီလိုအနေအထားမှာဆိုရင် လည်ပင်းကိုတဖက်အမြန်စောင်းငဲ့လှည့်လိုက်ပြီး ဇက်ချိုးလိုက်ရခြင်း က တင်းနေတဲ့အကြောတွေပြေပြီး သက်သာသွားကြသလိုမျိုး ခံစားရတတ်ပါတယ်။
ဒါပေမယ့် ဒီအလေ့အထ က ကြာလာပြီး အလေ့အကျင့်ဖြစ်လာတဲ့အခါ အရိုးကျီးပေါင်းဖြစ်ခြင်းအပြင်လည်ပင်းမှာရှိတဲ့အရိုးပြားတွေကို ထိခိုက်မိစေပြီး အာရုံကြောများဖိမိခြင်းကြောင့်လက်ထုံကျင်ခြင်းနဲ့ မူးဝေခြင်းများ ခံစားရတတ်ပါတယ်။တခါတလေ ဇက်ချိုးတာအရမ်းအရှိန်ပြင်းတဲ့အခါမျိုးမှာတော့ သွေးကြောတွေကိုပါ ထိခိုက်မိပြီး လေဖြတ်ခြင်းအထိဖြစ်စေနိုင်ပါတယ်။
ဇက်ချိုးတဲ့အသံကျယ်လေ ကိုယ့်ကိုယ်ကို ပိုပြီးကျေနပ်အားရလေ ဖြစ်တတ်ကြပေမယ့် တကယ်တမ်းကတော့ လည်ပင်းမှာရှိတဲ့ အရိုးပြားနဲ့ အာရုံကြောမျှင်လေးတွေကိုပျက်စီးစေရုံမျှမက လေဖြတ်နိုင်တဲ့အထိ အန္တရာယ်ရှိတာမို့ ဇက်ချိုးတတ်တဲ့အကျင့်ရှိသူများ သတိပြုနိုင်စေရန်အတွက် ရေးသားဖော်ပြပေးလိုက်ရပါတယ်။