အခုနောက်ပိုင်းကြုံတွေ့နေရတဲ့ လေထုညစ်ညမ်းခြင်း

ကျွန်မတို့ရဲ့ မြန်မာနိုင်ငံမှာ ဇန်နဝါရီလကစပြီးတော့ အခုဖေဖော်ဝါရီလကုန်ခါနီးထိကို မနက်စောစောဆိုရင် နှင်းတွေဝေသလို၊မြူတွေဆိုင်းသလို ကာလလေး ဖြစ်နေတာကို တွေ့ရှိရမှာဖြစ်ပါတယ်။မနက်စောစော လမ်းထလျှောက်သူတွေ၊စျေးသည်တွေနဲ့ အလုပ်သွားတဲ့သူတွေကတော့ နှင်းကျတယ်အထင်နဲ့ ပျော်ရွှင်ပြီး လေထုကို အားပါးတရရှူလို့ တနေ့တာရဲ့ လုပ်ငန်းကို စတင်ရန်အဆင်သင့်ဖြစ်နေကြပါပြီ။

တကယ်တော့ ကျွန်မတို့မနက်စောစောမြင်ရတာတွေက နှင်းမဟုတ်သလို မြူလည်းမဟုတ်ပါဘူး။အိမ်နီးချင်းထိုင်းနိုင်ငံအပါအဝင်ကမ္ဘာ့နိုင်ငံအတော်များများပါ လေထုညစ်ညမ်းခြင်းကအတော်ဆိုးဝါးလာပါတယ်။ဖေဖော်ဝါရီ ၃ ရက်နေ့ကဆိုရင် ကျွန်မတို့မြန်မာနိုင်ငံရဲ့လေထုညစ်ညမ်းမှုဟာ AQI - Air Quality Index (လေထုအရည်အသွေးညွှန်းကိန်း) အဆင့် ၂ အထိ သိသိသာသာမြင့်တက်လာခဲ့ပါတယ်။အခုလက်ရှိအနေအထားမှာ အဆင့်တစ်ရာကျော်ပြန်ရောက်သွားပေမယ့် စိတ်အေးလက်အေးနေလို့ရတဲ့ အခြေအနေမဟုတ်ပါဘူး။

🍀ဒါဆိုရင် လေထုညစ်ညမ်းမှု က ဘာလဲ?

နေ့စဉ်ရှူရှိူက်နေကြတဲ့လေထုထဲမှာ လူသားတွေအဓိကလိုတဲ့ အောက်စီဂျင်ဓာတ်ငွေ့ ၂၁ ရာခိုင်နှုန်းသာပါဝင်နေပြီး ကျန်တာကတော့ နိုက်ထရိုဂျင်ဓာတ်ငွေ့အများစု၊ကာဗွန်ဒိုင်အောက်ဆိုက် နဲ့ အခြားဓာတ်ငွေ့တွေ ပေါင်းစပ်ပါဝင်နေကြပါတယ်။

ကျွန်မတို့နေ့စဉ် အသုံးပြုနေတဲ့ ယာဉ်အမျိုးမျိုး၊ဓာတ်ငွေ့၊ဂတ်စ်မီးဖို၊ထင်းမီး၊မီးသွေးမီးဖို၊အရွက်ခြောက်မီးရှို့ခြင်း၊ဖုံအမျိုးမျိုး၊စက်ရုံအလုပ်ရုံတွေ၊အဆောက်အအုံနဲ့အိမ်တွေအပြင် တောမီးလောင်ခြင်း၊ရေနံထွက်ပစ္စည်း၊ကျောက်မီးသွေး၊သဘာဝဓာတ်ငွေ့ အစရှိတာတွေကြောင့် လေထုညစ်ညမ်းစေတဲ့ အိုဇုန်းဓာတ်ငွေ့တွေက အန္တရာယ်ရှိတဲ့ ခရမ်းရောင်အဆင့်ထိ တဖြည်းဖြည်းများပြားလာပါတယ်။

🍀လေထုညစ်ညမ်းရင် ဘာဖြစ်နိုင်သလဲ။

လေထုညစ်ညမ်းတဲ့အခါ အသက်ရှူမဝခြင်း၊ လည်ချောင်းခြောက်ကပ်နာကျင်ခြင်း၊  ချောင်းဆိုးခြင်း၊ အသက်ရှုစဉ်တရွှီရွှီမြည်ခြင်း၊ မျက်စိနီမျက်စိစပ်ခြင်း၊ ရင်တုန်ခြင်း၊ မောပန်းလွယ်ခြင်း၊ အိပ်မပျော်ခြင်း နဲ့  အရေပြားယားယံခြင်း စတာတွေကို ခံစားရတတ်ပါတယ်။

ဒါကြောင့်မို့ ကလေးငယ်များ၊ သက်ကြီးရွယ်အိုများ၊ပန်းနာရင်ကြပ်၊ နှလုံး၊ ဆီးချိုရောဂါရှင်များနဲ့ ကိုယ်ဝန်ဆောင်မိခင်များ  ဟာ အထူးသတိထားဖို့ လိုအပ်ပါတယ်။ဒါ့အပြင် ပြင်းထန်စွာ အားကစားလုပ်သူများအနေနဲ့လည်း အဆိပ်ရှိတဲ့ဓာတ်ငွေ့တွေကို ပိုရှူရှိုက်နေရသလို ဖြစ်တဲ့အတွက်ကြောင့်အားကစားပြင်းပြင်းထန်ထန်လုပ်တာကိုလည်း ယခုကာလမှာ ရှောင်ရှားသင့်ပါတယ်။

🍀ဒါဆိုရင် ဘာတွေ ပြင်ဆင်သင့်လဲ?

၁။လေထုညစ်ညမ်းစေတဲ့ အမှုန်မွှားငယ်ဟာရိုးရိုး mask နဲ့ မကာကွယ်နိုင်တဲ့အတွက် N95/KN95 နှာခေါင်းစည်းကို အပြင်ထွက်တိုင်း တပ်ပေးဖို့ လိုအပ်ပါတယ်။

၂။မလိုအပ်ပဲ အပြင်ထွက်ခြင်းမှ ရှောင်ကြဉ်ပြီးအိမ်တွင်းမှာလည်း လေဝင်လေထွက်ကောင်းအောင် ဂရုစိုက်ပါ။  

၃။မျက်လုံး/နှာခေါင်း ယားယံမှုရှိလျှင် ဆားရည်နဲ့ သန့်စင်ပါ။မျက်လုံးနီရဲ/ခြောက်ခြင်းများရှိပါက မျက်စဉ်းထည့်ပါ။

၄။အခန်းတွင်း ‌လေထုသန့်စင်စက်များ၊ရေငွေ့ထုတ်စက်များကို လေထုသန့်ရှင်းစေရန်အသုံး ပြုပါ။ 

၅။ရေဓာတ်ပြည့်ဝစေဖို့ အရည် များများ သောက်ပါ။ အရည်ရွှမ်းတဲ့ သစ်သီးဝလံတွေကို စားပေးပါ။

တကယ်လို့ မသက်သာပါက လေထုညစ်ညမ်းခြင်းကြောင့် ဖြစ်လာတဲ့ အရေပြားပြဿနာ၊မျက်စိနဲ့အဆုတ်ရောဂါများအတွက် ကျွန်မတို့ My-Medicine မှ အထူးကုဆရာဝန်ကြီးများနဲ့ ရက်ချိန်းယူပြီး တိုင်ပင်ဆွေးနွေးလို့ရပါတယ်ရှင်။