ဆောင်းရာသီရဲ့ အန်တတ်တဲ့အကောင်ငယ်လေး ❄️🦠
အိမ်နီးချင်းတရုတ်နိုင်ငံမှာ အစာအိမ်ရောဂါလက္ခဏာတွေကို အဓိကဖြစ်စေတဲ့ ရောဂါဆန်းတခုပျံ့နှံ့နေပြီဆိုတဲ့ သတင်းဟာ ဒီရက်ပိုင်းပျံ့နှံ့လို့နေပါတယ်။ဒီရောဂါပိုးကူးစက်ခံရတဲ့သူဟာ ဝမ်းအလွန်အမင်းလျှောပြီး အဆက်မပြတ်အန်တတ်သလို ကာကွယ်နိုင်တဲ့ဆေးလည်း မပေါ်သေးဘူးဆိုတော့ ကျွန်မတို့တွေရဲ့ ဘဝမှာ ၃ နှစ်တာကြောက်ခဲ့ရတဲ့ ကိုဗစ်အိမ်မက်ဆိုးကိုတောင် ပြန်သတိရမိစေပါတယ်။
နိုရိုဗိုင်းရပ်စ်ဟာ အစာအိမ်နဲ့အူလမ်းကြောင်းကို တိုက်ခိုက်တဲ့ရောဂါပိုးတမျိုးဖြစ်ပြီး မသန့်ရှင်းတဲ့ကြမ်းခင်းတွေ၊ဗွက်ထနေတဲ့ရေတွေအပြင်အစားအသောက်ပြင်ဆင်ချက်ပြုတ်ရာမှာ မသန့်ရှင်းရာကနေတဆင့်အများဆုံးကူးစက်တတ်ပါတယ်။အစားအသောက်တွေကိုကြားခံထားပြီး ကူးစက်နိုင်တဲ့ရောဂါမို့လို့ မူးဝေအော့အန်ခြင်း၊ဝမ်းလျှောခြင်း၊ဝမ်းဗိုက်အောင့်ခြင်း လက္ခဏာတွေကို အများဆုံးတွေ့ကြုံခံစားရနိုင်ပါတယ်။ပြင်းထန်လာရင်တော့ တကိုယ်လုံးနာကျင်ကိုက်ခဲပြီး အပူချိန်တက်တဲ့အထိဖြစ်နိုင်ပါတယ်။ဒီလက္ခဏာတွေကတော့ ရောဂါပိုးကူးစက်ခံရပြီး ၁၂ နာရီအတွင်းပေါ်လာတတ်ပါတယ်။
နိုရိုဗိုင်းရပ်စ်ဆေးပညာရှင်တွေ ချစ်စရာနာမည်ပြောင်ပေးထားတာကတော့ "ဆောင်းရာသီရဲ့ အန်တတ်တဲ့အကောင်ငယ်လေး “ဆိုပြီးပဲဖြစ်ပါတယ်။ပုံမှန်ဝမ်းပျက်ဝမ်းလျှောရောဂါဟာ မိုးရာသီမှာပဲဖြစ်တတ်ကြပါတယ်။ဒီရောဂါပိုးကတော့ ဆောင်းတွင်းမှာအဖြစ်များတဲ့အပြင် အရမ်းကူးစက်မြန်တဲ့အတွက် ရောဂါဖြစ်သူရဲ့ အစားအသောက်နဲ့ရေကို အတူသောက်သုံးမိရာကနေလည်း တခြားလူတစ်ယောက်ဟာ ကူးစက်သွားနိုင်ပါသေးတယ်။ဒါ့အပြင်ရောဂါဖြစ်သူကမစင်နဲ့ အန်ဖတ်ကို သေချာမစွန့်ပစ်မိပါကယင်ကောင်နဲ့ တခြားအင်းဆက်တွေ နားရာကနေတဆင့်လည်း ရေနဲ့အစားအစာတွေဆီကို ရောဂါပျံ့နှံ့နှုန်းကပိုမြန်နိုင်ပါသေးတယ်။
နိုရိုဗိုင်းရပ်စ် ရှင်သန်နေသော ရေနဲ့အစားအစာတွေ၊သစ်သီးဝလံတွေကို ဆေးမိရင်တောင် ကူးစက်နိုင်သလို ရောဂါရှိတဲ့သူက လက်ဗလာနဲ့ ကိုင်ထားတဲ့ အရာဝတ္ထု၊မျက်နှာပြင်ဟင်းသီးဟင်းရွက်၊အစားအစာနဲ့ ရေတွေမှာလည်း ရောဂါပိုးကရောက်ရှိသွားနိုင်ပါသေးတယ်။သောက်သုံးရေလှောင်ထားတဲ့ ဆည်၊ကန်၊အင်း၊အိုင်နဲ့ ချောင်းနားမှာ ရောဂါရှိသူတဦးရှိနေရင်လည်း ရေမှတဆင့်ရောဂါပိုးများ ကူးစက်နိုင်တဲ့အထိ ကူးစက်နှုန်း အရမ်းမြန်တဲ့ရောဂါတခုဖြစ်ပါတယ်။
တချို့လူတွေမှာ ရောဂါလက္ခဏာမခံစားရဘဲရှိနိုင်သလို တချို့ကတော့ ၄၈ နာရီကြာရင် အလိုလိုပျောက်ကင်းသွားတတ်ပါတယ်။ဒါပေမယ့်နောက်ထပ် ၂ ပတ်လောက်ကြာတဲ့ အထိ မစင်မှာ ပိုးတွေ့ရနိုင်သေးတဲ့အပြင် သေချာမကုသဘူးဆိုရင် ရောဂါပိုးဟာ လပေါင်းများစွာအထိ ကျန်ရှိနေနိုင်ပါတယ်။အဓိကကတော့ ရေဓာတ်နဲ့ ဓာတ်ဆားဖြည့်ပြီး ၂-၃ ရက်လောက်ကောင်းကောင်းအနားယူဖို့လိုပါတယ်။တကယ်လို့ အန်တာ ၂ ရက်ကျော်နေရင်၊ဝမ်းလျှောတာ တပတ်ကျော်နေရင်၊အစိမ်းရောင်/ကော်ဖီရောင်တွေအန်နေရင်၊ဇက်တခုလုံးတောင့်တင်းနေရင်၊အစာအိမ်ကမခံမရပ်နိုင်အောင်ထိုးအောင့်နေရင်တော့ ဆရာဝန်နဲ့ချက်ချင်းသွားပြပြီး အရေးပေါ်ဆေးကုသမှုခံယူသင့်ကြောင်း အသိပေးပါရစေနော်……