မိခင်တစ်ယောက်ဖြစ်ဖို့ ရွေးချယ်လိုက်ခြင်းဟာ ရှည်လျားပြီး အချိုးအကွေ့များတဲ့ ခရီးတခုကို စိန်ခေါ်လိုက်ရသလိုပါပဲ။ပထမဆုံးအနေနဲ့ ရင်သွေးလေးကို ဗိုက်ထဲထည့်လွယ်ထားရတဲ့ ၉ လတာကာလဟာ သေမင်းနဲ့အပြိုင်စစ်ခင်းရတဲ့အခြေအနေလို့ တင်စားရလောက်တဲ့အထိ အစစအရာရာ ပင်ပန်းလွန်းပါတယ်။သာမန်အမျိုးသမီးတွေအတွက်တောင် ခက်ခဲတဲ့ ဒီကာလရှည်ကြီးကို နဂိုထဲက နှလုံးအားနည်းသူအမျိုးသမီးဆိုရင်ရော အဆင်ပြေနိုင်ပါ့မလား။
နှလုံးအားနည်းခြင်းဆိုသည်မှာ နှလုံးရောဂါမဟုတ်ပါဘူး။ဒါပေမယ့် အမျိုးသမီးအများစု က စိုးရိမ်စိတ်များပြီး စားမဝင်အိပ်မပျော်ဖြစ်တဲ့အခါ သူတို့ကိုယ်သူတို့ နှလုံးအားနည်းနေတယ်လို့ ယူဆကြပါတယ်။နှလုံးအားနည်းခြင်းလို့ခေါ်တဲ့ Cardi asthenia ကတော့ အမျိုးသားရော အမျိုးသမီးရော အသက်အရွယ်မရွေးဖြစ်ပွါးနိုင်ပါတယ်။အတွေ့ရများတဲ့ လက္ခဏာတွေကတော့ နှလုံးခုန်မြန်ရင်တုန်လွယ်ခြင်း၊မောပန်းလွယ်ခြငိး၊အသက်ရှူမဝခြင်း၊ရင်ဘတ်အောင့်ခြင်းနဲ့ ရုတ်တရက်နောက်ကျောဖက်ကချွေးပြန်လာခြင်းတို့ပဲဖြစ်ပါတယ်။
ဒါပေမယ့် နှလုံးရောဂါလားဆိုပြီး ဆေးစစ်ရင်တော့ နှလုံးရောဂါတွေရဲ့ပုံစံမျိုးမတွေ့ရပါဘူး။အဖြစ်များရတဲ့အကြောင်းရင်းတွေက စိတ်ဖိစီးမှုများခြင်း၊ဆေးလိပ်နဲ့အရက်အလွန်အကျွံသောက်ခြင်း၊နာတာရှည်စိတ်ကျရောဂါရှိခြင်းနဲ့ အလွန်အမင်းစိုးရိမ်တတ်ခြင်းတို့ကြောင့် ဖြစ်ပေါ်လာရခြင်းဖြစ်ပါတယ်။တခါတလေ ညဖက်အိပ်ပျော်နေရင်းနဲ့ပဲဖြစ်ဖြစ်၊အဝတ်အစားကျပ်ကျပ်ဝတ်မိရင်ပဲဖြစ်ဖြစ် ဒီလိုလက္ခဏာတွေရုတ်တရက်ဖြစ်ပေါ်လာတတ်ပါတယ်။
နှလုံးအားနည်းတဲ့သူကိုယ်ဝန်ဆောင်တဲ့အခါမှာ နှလုံးရောဂါဖြစ်မှာထက် စိတ်နဲ့ဆိုင်တဲ့အခြေအနေတွေကို အထူးသတိထားဖို့လိုအပ်ပါတယ်။ကိုယ်ဝန်လနုတုန်း ပျို့အန်တာကအစပြုပြီးကိုယ်ဝန်လရင့်လာတာနဲ့အမျှ နေရထိုင်ရခက်တာမျိုးတွေအထိပါရှိနိုင်ပါတယ်။ကလေးမွေးပြီးရင်လည်း ကာလကြာရှည် အိပ်ရေးပျက်ခြင်းနဲ့အတူပင်ပန်းမှုတွေက မရေမတွက်နိုင်အောင်ပါပဲ။ကျန်းမာတဲ့အမျိုးသမီးတောင် အခန့်မသင့်ရင် ကလေးမွေးဖွားပြီးတဲ့အခါ စိတ်ကျရောဂါခံစားရတတ်တဲ့အတွက်ကြောင့် နှလုံးအားနည်းသူကိုယ်ဝန်ဆောင်အနေနဲ့ ဒီအချက်တွေကို ဂရုပြုပြီး ကိုယ်ဝန်မဆောင်ခင်ထဲက လေ့ကျင့်ခန်းလုပ်ခြင်းနဲ့ တရားထိုင်ခြင်းများကို mindfulness အနေနဲ့ ကျင့်သားရအောင် ကြိုတင်ပြုလုပ်ထားသင့်ပါတယ်။
ကိုယ်ဝန်ဆောင်စဉ်ကာလမှာ နှလုံးက ပုံမှန်ထက် ၄၀ ရာခိုင်နှုန်းပိုအလုပ်လုပ်ရပြီး စိတ်ဖိစီးမှုကလည်း ၃ ဆလောက်ပိုမိုမြင့်တက်လာတတ်ပါတယ်။တကယ်လို့ နှလုံးအားနည်းတာအပြင် ကိုယ်တိုင် က နှလုံးသွေးကြောကျဉ်းရောဂါအခံရှိနေရင်၊သွေးတိုးရောဂါရှိနေရင်တော့ ကိုယ်ဝန်ဆိပ်တက်တဲ့ပြဿနာလိုမျိုးတွေပါ ဖြစ်နိုင်လို့ ကလေးမယူခင်ကာလမှာ သားဖွားမီးယပ်ဆရာဝန်နဲ့ရော သမားတော်နဲ့ပါ သေချာတိုင်ပင်ဆွေးနွေးပြီး ကိုယ်ဝန်ဆောင်ကာလ ကို အထူးဂရုတစိုက်နဲ့ ဖြတ်သန်းသွားဖို့ အများကြီး လိုအပ်ပါတယ်ရှင်။